شركة نجم ومؤسسة النقد

من منا ما يعرف شركة نجم وطريقة حساب نسبة الحوداث والخ  كلام كثير يدور حولهم مالكم بالطويله باختصرها قدر الإمكان  فكل تجديد لاحدى المركبات الخاصه فيني اتفاجا بان ماعندي خصم نهائيا كنت مضطر وسددت بعد ماخلصت شمرت عن ساعدي وجلست ابحث وابحث وابحث وصلت لموقع شركة نجم ثم افراد ثم استعلام وطلعت عندي سياره قديمه مؤمنه عن طريق البطاقة الجمركيه مو الاستماره طيب ومنتهيه راسلت نجم قالو لا مالنا دخل خل شركة التامين تحدث الوثيقه اروح لشركة التامين تقول منتهيه أصلا كيف احدث ؟  عرفت ان فيه لعبه بينهم ومع الأسف مافي طريقة او معلومات بخصوص هالشي رفعت شكوى في مؤسسة النقد و النقد تقول لازم  10 أيام مر 20 يوم واتصل بالدعم الفني يقول مصعده للجهة المختصه في اليوم 25 تكرمت مؤسسة النقد مشكوره بالرد وياليتها ماردت لان الرد كان جدا بارد وقالو حولناها لنجم ويانجم عدل التاريخ عندك ؟؟ طيب وانا انتظر ومجدد على بالي هذي المشكلة وخطا شركة التامين  ( المفروض شركة التامين ترجع تتصل بعد فتره وتقول عطني الرقم التسلسلي للمركبه بعد اصدار الاستماره ) والكل عارف ان الهم الأكبر الفلوس كيف تجيبها ما يهم خدمة العملاء تكرمو نجم ويذلوني عليها بانهم عدلوها بس تواجه مشكلة ثانيه ؟؟ قلت ان لله وان اليه لراجعون ولا حول ولا قوة الا بلله  وش هي المشكله قال عندك شركتين تامين مو رابطين ارقام اللوجه بوثيقه التامين طبعا هنا ندخل في مشوار طويل وكل مره ادعي وأقول يارب الهمني صبر أيوب عليه السلام  الشركة الأولى تقول بياناتك صحيحه واللوحه مربوطه صحيح بالوثيقه طيب وين المشكله ؟؟ بعد التفحيط خلنا نقول وصلنا الى نجم مره ثانيه ووراني صوره من النت الداخلي عندهم ان اللوح مو مكتوبه ومكتوبه بالوثيقه الصحيحه فعرفت ان فيه خلل برمجي في نجم واشتكيت وكلمتهم ولا في البال طبعا هم المرجع الأساسي لجميع شركات التامين رفعت شكوى ثانيه في مؤسسة النقد على نجم واغلقوها بحكم ان الوثيقه صحيحه  انا جلست مع نفسي وقلت وش السالفه ( فاتضح لي ان الموظف المختص في النقد ليس على درايه بالموضوع ) جتني الفتوى تمشي الف قلت لهم بشتكي على القرار الغير صحيح المشكلة من نجم مو شركة التامين  مالنا بالطويله قررت ارفعها ثانيه مره والحمدلله رفعتها  وتاخرو جدا جدا جدا في اتاخذ القرار عرفت ان في مراسلات داخليه بينهم انا ما اشوفها وهي من مصالحهم والمفترض اني اطلع على كل شي يدور بينهم بعد شهر قرر احد المختصين في النقد انه يحول التذكره من شركة التامين الى نجم ويجبرهم فعلا امر محير جدا من النقد والحمدلله تحدث الأولى وجا دور الثانيه وكل شوي ارفع شكوى تغلق مره راجع شركة التامين ومره راجع نجم الى ان كلمني واحد من نجم الله يستر عليه قال لي بالحرف الواحد انسى الموضوع اذا ماجاني ايميل رسمي شركة التامين اني اعدل بخلاف كذامالي سلطه .. انا مافي علامة تعجب ولا في علامة استفهام ماطلعت لي لهذي الدرجه معقدينها علي … توكلت على الله وانطلقت الى لجنة الفصل في المنازعات التامينه وقدمت على نجم خصمي وطلبو مني أوراق برضو معقده سجل حوادث لاخر 5 سنوات من نجم ومن المرور ومشاوير اضطريت اجزءها الى ان انهيها كامله لان كل واحد جب خطا لكن الله سهلها اتصلو على بسرعه  ( للي ما يعرف اللجنه من مؤسسة النقد لكن اجارة مختلفه ) شرحت كل شي وجتني رساله بموعد الجلسه وانا مبسوط جا الموعد وكالعاده انتظار فوق الساعه عن الموعد الأصلي دخلنا انا والمحامي من طرفهم ماتكلمت بشي ولكن الحمدلله حكم لصالحي بعد الحكم انتظار تقريبا شهر لاخذ اصل الوثيقه والمطالبه.. بعدها محد عرف وش نسوي نجم رافعه خشمها مع الموظفين المتكبيرين وشركة التامين قالت قدامك الوثيقه فيها غلط ابشر بالعوض .

توجهت للمحكمه العامه ارفع قرار الفصل لصحالي المحكمه ترفضه اكثر من مره قلت معقوله محد يعرف ؟؟

وصلت الى محكمة التنفيذ وشرحت لهم ضحك المنفذ قال أخيرا ضد نجم وانا مستغرب قلت ليش قال أسبوع ماحلو المشكلة  استدعاء

خلال أسبوع ماوقف جوالي حنا تحت امرك وحنا اللي تبي قلت لهم عدلو لي النظام السيء تبعكم وانا متنازل .. كلها ساعات وقالو ممكن تتاكد وحنا معاك على الخط قلت ابشر ورجع لي استحقاق الخصم اللي لي وانا مرتاح وقلت لهم وش يضمن ماتعدلونه زي قبل قالو عدلناها بالنظام فعرف ان النظام عندهم سيء . تم التنازل مقابل اصلاح الخلل .

اترك تعليقاً